Եվրոպան ցանկանում է «օդային վահան» ստեղծել Ուկրաինայում

Եվրոպան չի հավատում Ուկրաինական հակամարտությունում դիվանագիտական ճանապարհով հրադադարի հասնելու հնարավորությանը, ուստի ցանկանում է փակել Ուկրաինայի երկինքը ԱՄՆ-ի օգնությամբ։ Այս մասին հայտնում է Financial Times թերթը՝ հղում անելով իր աղբյուրներին։

«Այժմ խոսակցություններ են գնում Ուկրաինայի համար ամերիկյան «օդային վահանի» միջոցով «հրադադարի փաստացի ռեժիմի» ստեղծման մասին», - ասվում է նյութում: Ենթադրվում է՝ այս վահանը կուժեղացնի Ուկրաինայի ՀՕՊ-ը՝ երկինքը փակելով ԱԹՍ-ներից: Եվրոպացիներն իրենց հերթին առաջարկել են ռազմածովային աջակցություն ցուցաբերել։ Քննարկվում է նաև ավիակիրների տեղակայման հարցը, «հավանաբար Եվրոպայից»։ 

Թերթը հաղորդում է՝ «աջակիցների կոալիցիայի» շատ երկրներ իրականում չեն ցանկանում իրենց զորքերն ուղարկել Ուկրաինա։ Մասնավորապես, խոսքը Գերմանիայի, Իտալիայի և Լեհաստանի մասին է։ Նույնիսկ այն երկրները, որոնք ծրագրում են դա անել, ցանկանում են, որ ԱՄՆ-ն «նյութատեխնիկական և օդային աջակցություն» ապահովի։ Բացի այդ, նրանք պատրաստ կլինեն իրենց զինվորականներին ուղարկել միայն հրադադարի ռեժիմի հասնելուց հետո։