Ռուսաստանը ՆԱՏՕ-ի ընդլայնման դեպքում կձեռնարկի հակազդեցության միջոցներ․ ՌԴ ԱԳՆ

Ռուսաստանը իր ռազմական պլանավորման մեջ հաշվի է առնում ՆԱՏՕ-ի զորակազմի ընդլայնումը և անհրաժեշտության դեպքում կձեռնարկի հակազդեցություններ։ Այս մասին ՌԻԱ Նովոստիին տված հարցազրույցում հայտարարել է Ռուսաստանի արտաքին գործերի նախարարության Եվրոպական խնդիրների վարչության տնօրեն Վլադիսլավ Մասլեննիկովը։

Նրա խոսքով՝ դաշինքը որոշել է գումարտակային մարտավարական խմբերի թիվը «արևելյան թևի» երկայնքով դաշինքի բոլոր անդամ երկրներում հասցնել բրիգադի մակարդակի։ Ռուսաստանը սա համարում է ագրեսիայի դրսևորում։

«Մենք, մեր հերթին, տեղյակ ենք այս սադրիչ նախապատրաստությունների մասին, գնահատում ենք Ռուսաստանի անվտանգությանը սպառնացող ռիսկերն ու սպառնալիքները, հաշվի ենք առնում դա մեր ռազմական պլանավորման մեջ և անհրաժեշտության դեպքում ձեռնարկում ենք համապատասխան փոխհատուցող հակազդեցություններ», - ասել է Մասլեննիկովը։