Tesla-ի ապագան՝ $8,5 տրիլիոն արժողությամբ ընկերություն և Մասկի ռեկորդային վարձատրություն

Reuters-ի վերլուծությունը ներկայացնում է, թե ինչպիսի աներևակայելի թվեր է պետք իրականացնել Tesla-ի համար, որպեսզի արդարացնի Իլոն Մասկի նոր, տասնամյակային վարձատրության փաթեթը։ Ըստ հաշվարկների՝ ընկերությունը պետք է հասնի $8,5 տրիլիոն շուկայական արժեքի՝ գերազանցելով Microsoft-ին ու Nvidia-ին միասին վերցրած։ Այս նպատակին հասնելու համար Tesla-ն ծրագրում է ներդնել Optimus մարդանման ռոբոտների զանգվածային արտադրություն՝ տարեկան ավելի քան 100 միլիոն միավոր վաճառքով, և ստեղծել ռոբոտաքսիների ցանց, որի եկամուտը մի քանի անգամ կգերազանցի Uber-ի ցուցանիշները։

Tesla-ի ներկայիս EBITDA շահույթը գնահատվում է $13 միլիարդ, սակայն Մասկի պայմանագրով սահմանված նպատակները հասնում են $400 միլիարդի։ Եթե ներդրողները շարունակի գնահատել ընկերությունը շահույթի նկատմամբ նույն բարձր գործակցով (75 անգամ EBITDA), ապա անհրաժեշտ կլինի շուրջ $113 միլիարդ շահույթ՝ $8,5 տրիլիոն կապիտալիզացիայի համար։ ARK Invest-ն արդեն կանխատեսել է Tesla-ի շուկայական արժեքի աճը մինչև $10,9 տրիլիոն 2029-ին՝ ռոբոտաքսիների տարեկան $951 միլիարդ եկամտի շնորհիվ։

Մասկը, ով Tesla-ի ապագան կապում է ռոբոտների և ինքնավար կառավարման տեխնոլոգիաների հետ, Optimus ռոբոտը տեսնում է որպես ընկերության արժեքի մինչև 80%-ի աղբյուր։ Վերլուծաբանները նշում են, որ այս ծրագիրը չափազանց հավակնոտ է, սակայն կարող է երկարաժամկետ հեռանկարում փոխել ամբողջ շուկան։ Նոր վարձատրության փաթեթը, որը դեռ պետք է հաստատվի բաժնետերերի կողմից նոյեմբերին, գնահատվում է որպես խթան՝ ընկերության աճի տեմպերը վերականգնելու և ներդրողների վստահությունը վերականգնելու համար։