Լեհաստանը Մոսկվային մեղադրում է ագրեսիայի մեջ

Լեհաստանը օգտագործել է իր և ՆԱՏՕ-ի ՀՕՊ համակարգերը՝ անօդաչու թռչող սարքերի հարձակումը հետ մղելու համար: Այս մասին հաղորդում է Reuters-ը՝ հղում անելով Լեհաստանի ռազմական հրամանատարությանը:

Սա առաջին դեպքն է ռուս-ուկրաինական հակամարտության ընթացքում, երբ Վարշավան իր օդային տարածքում ՀՕՊ է օգտագործել:

Հրամանատարության տվյալներով՝ ռադարները գրանցել են ավելի քան 10 օբյեկտ, և նրանք, որոնք կարող էին սպառնալիք ներկայացնել, «չեզոքացվել են»:

«Մեր օդային տարածք մտած անօդաչու թռչող սարքերից որոշները խոցվել են: Այդ օբյեկտների հնարավոր անկման վայրերի որոնումը և նույնականացումը շարունակվում է», - ասվում է հայտարարության մեջ:

Լեհական բանակը երկրի օդային տարածքի խախտումն անվանել է «ագրեսիայի ակտ»: Պաշտպանության նախարար Վլադիսլավ Կոսինյակ-Կամիշը հայտարարել է, որ լեհական ինքնաթիռները «զենք են օգտագործել թշնամական օբյեկտների դեմ»: Նա հավելել է, որ երկիրը մշտական ​​կապի մեջ է ՆԱՏՕ-ի հրամանատարության հետ:

Իր հերթին Լեհաստանի վարչապետ Դոնալդ Տուսկը հայտարարել է, որ հանրապետության օդային տարածքը խախտած անօդաչու թռչող սարքերը (ԱԹՍ) ռուսական են եղել։ Քաղաքական գործիչը այս մասին գրել է X սոցիալական ցանցում։

«Անցած գիշեր Լեհաստանի օդային տարածքը խախտվել է մեծ թվով ռուսական անօդաչու թռչող սարքերի կողմից։ Այն անօդաչու թռչող սարքերը, որոնք ուղղակի սպառնալիք էին ներկայացնում, խոցվել են։ Ես մշտական ​​կապի մեջ եմ ՆԱՏՕ-ի գլխավոր քարտուղարի և մեր դաշնակիցների հետ»,– գրել է նա։