Մասկը կհատկացնի մեկ միլիոն դոլար՝ սպանված ուկրաինուհու պատկերը հավերժացնող մուրալների համար

Ամերիկացի միլիարդատեր և Tesla-ի հիմնադիր Իլոն Մասկը հայտարարել է, որ կհատկացնի մեկ միլիոն դոլար՝ ԱՄՆ-ում սպանված ուկրաինացի փախստական Իռինա Զարուցկայայի պատկերը պատկերող մուրալներ ստեղծելու համար։ Բիզնեսմենը արձագանքել է դրամահավաքի նախաձեռնությանը, որի նպատակն է արվեստի միջոցով հիշեցնել ողբերգական միջադեպի մասին և տեղադրել մուրալներ երկրի տարբեր «նշանավոր վայրերում»։

Մասկի նախաձեռնությանը միացել է նաև Intercom ընկերության ղեկավար Էոգան Մաքքեյբը, ով հայտարարել է, որ պատրաստ է ներդնել 500 հազար դոլար։ Այս քայլը մեծ արձագանք է գտել սոցիալական հարթակներում, որտեղ օգտատերերը կոչ են անում ուշադրություն դարձնել ԱՄՆ-ում աճող բռնությանը և պաշտպանել փախստականների իրավունքները։

23-ամյա Իռինա Զարուցկայան զոհվել է օգոստոսի 22-ին՝ Հյուսիսային Կարոլինայի Շարլոթ քաղաքում թափառականի հարձակման հետևանքով։ Դեպքը մեծ հանրային վրդովմունք է առաջացրել՝ դառնալով նոր քննարկումների առիթ ԱՄՆ-ում հասարակական անվտանգության և միգրանտների պաշտպանության հարցերում։