«Яковлев»-ի նախկին տնօրենը նշանակվել է շքեղ Aurus ավտոմեքենաների արտադրողի ղեկավար

Ռուսական շքեղ ավտոմեքենաներ արտադրող «Աուրուս» ընկերությունը նոր ղեկավար ունի․ Ելաբուգայում գործող գլխամասի և Մոսկվայի «Aurus Motors»-ի ղեկավար է նշանակվել Անդրեյ Բոգինսկին։ «Ինտերֆաքս»-ի տեղեկացմամբ՝ փոփոխությունները գրանցվել են սեպտեմբերի 9-ին։

Բոգինսկին 2021-ից մինչև 2024-ի նոյեմբեր ղեկավարել է «Яковлев» ավիացիոն ձեռնարկությունը և եղել Միացյալ ավիաշինարարական կորպորացիայի քաղաքացիական ավիացիայի փոխնախագահ։ Նրա պաշտոնանկությունը կապվել է վարչապետ Միխայիլ Միշուստինի որոշման հետ՝ քաղաքացիական ավիացիայի ծրագրերի ձախողման պատճառով։

«Яковлев»-ը պատասխանատու է Ռուսաստանի երկու առանցքային նախագծերի՝ SJ-100 և МС-21 ինքնաթիռների մշակման և արտադրության համար։ Սակայն այս ծրագրերը դեռևս ուշացումների փուլում են․ SJ-100-ի նոր շարժիչը չի սերտիֆիկացվել, իսկ МС-21-ը դեռ չի անցել առևտրային մոդիֆիկացիայի թռիչքային փորձարկումներ։