Այսօր տոնում ենք հայ մեծանուն կոմպոզիտոր Առնո Բաբաջանյանի 91-ամյակը

Հայ անվանի կոմպոզիտոր և դաշնակահար Առնո Բաբաջանյանը ծնվել է 1921թվականին Երևանում։ Բաբաջանյանի հայրը շնորհալի մարդ էր. ֆլեյտա էր նվագում և նրա ընտանիքում սիրում էին երաժշտությունը։

Փոքրիկ Առնոյի կյանքում առաջին հանդիպումը իսկական կոմպոզիտորի հետ տեղի է ունեցել մանկապարտեզում։ Նա միշտ սիրով է հիշել այդ հանդիպումը. «Մի անգամ եկավ մի այցելու։ Այդ մարդը խնդրեց մեզ երգել, որպեսզի իմանա, թե ով ինչ ձայն ունի։ Ես նույնպես երգեցի և ռիթմի տակ ծափ տվեցի։ Այդ մարդը լսեց ու ասաց, որ պետք է զբաղվեմ երաժշտությամբ։ Ավելի ուշ իմացա, որ այդ մարդը Արամ Իլյիչի Խաչատրյանն էր», – պատմում էր հանճարեղ կոմպոզիտորը։

1929 թվականին Առնո Բաբաջանյանն ընդունվում է Երևանի կոնսերվատորիային կից երաժշտական դպրոցը։

Նա ինը տարեկանում գրում է իր առաջին` «Պիոներական քայլերգ» ստեղծագործությունը, որն էլ փոքրիկ Առնոյին ճանաչում է բերում։

1936 թվականին վերջինս ընդունվում է կոնսերվատորիա՝ ուսանելով անվանի կոմպոզիտոր Վարդգես Տալյանի դասարանում։ Այնուհետև ուսումը շարունակում է Մոսկվայի կոնսերվատորիայում։

Առնո Բաբաջանյանը մասնակցել է Հայրենական մեծ պատերազմին և այդ տարիներին գրել է հայրենասիրական գործեր. «Վաղարշապատի պարը», «Հերոսական բալլադ», կոնցերտներ ջութակի և դաշնամուրի համար։

Վերջինս բազմաթիվ սիրված երգերի հեղինակ է. «Բարձր պահենք բարեկամության դրոշը», «Գուշակիր ցանկությունս», «կամուրջներ», «Առաջին սիրո երգը», «Քեզ հետ», «Ես սպասում եմ քեզ» և այլն։

Մեծ է Առնո Բաբաջանյանի դերը հայակական և խորհրդային էստրադայում, ինչպես նաև դասական երաժշտության մեջ։

Իր կյանքի վերջին տարիներին նա գրել է երաժշտություն նաև ֆիլմերի համար։

1950-1956 թթ. դասավանդել է Երևանի կոնսերվատորիայում: 1956-ից հաստատվել է Մոսկվայում, ուր և վախճանվել է 1983-ի նոյեմբերի 11-ին: