Կառավարության և ԿԲ-ի քայլերի շնորհիվ Ռուսաստանում գնաճի տեմպերը դանդաղում են. Միշուստին

Ռուսաստանի վարչապետ Միխայիլ Միշուստինը հայտարարել է, որ գնաճի տեմպերի դանդաղումը պայմանավորված է կառավարության և Կենտրոնական բանկի կողմից իրականացված միջոցառումներով։ Նրա խոսքով՝ ռուսական արտադրական հզորությունների ընդլայնումը և գնաճի վերահսկման ծրագրերը թույլ են տվել հասնել դրական միտումների։

Վարչապետը նշել է, որ օգոստոսի վերջում նկատվել է մրգերի և բանջարեղենի գների նվազում։ Տնտեսական զարգացման նախարարության տվյալներով՝ սեպտեմբերի 1-ի դրությամբ տարեկան գնաճը հասել է 8.28%-ի՝ նախորդ շաբաթվա 8.43%-ի փոխարեն։ Միշուստինը հավելել է, որ տնտեսության որոշակի դանդաղեցումը կանխատեսված էր, սակայն ՀՆԱ-ն շարունակում է աճել՝ յոթ ամսում գրանցելով 1.1% աճ, իսկ գործազրկության մակարդակը մնում է պատմական նվազագույնի՝ 2.2%։

Կառավարության առաջիկա հիմնական նպատակներն են տնտեսության հավասարակշռված աճի վերադարձը և ներդրումային միջավայրի որակի բարձրացումը։ Միշուստինը ընդգծել է, որ բիզնեսը հարմարվում է նոր պայմաններին, փնտրում նոր շուկաներ և գործընկերներ, իսկ իշխանությունները շարունակելու են աջակցել տնտեսության կայունացմանը։