ԱՄՆ Կոնգրեսը հավանություն է տվել 2026-ի ռազմական ծախսերին

ԱՄՆ Կոնգրեսի Ներկայացուցիչների պալատը հավանություն է տվել 2026 ֆինանսական տարվա համար գրեթե 900 միլիարդ դոլարի ռազմական ծախսերին, ներառյալ 400 միլիոն դոլարը Ուկրաինային օգնելու համար: Այս մասին հայտնում Է The New York Times-ը։

Փաստաթղթին աջակցել են 231 օրենսդիրներ, 196-ը դեմ են արտահայտվել։ Այն, մասնավորապես, ներառում է կետ, որը նախատեսում է 400 մլն դոլարի հատկացում Կիևին ռազմական օգնություն ցուցաբերելու համար։ Այդ միջոցները նախատեսվում է հատկացնել Ուկրաինայի անվտանգության աջակցության նախաձեռնության գծով։ Այն նախատեսում Է Պենտագոնի կողմից արտադրողների հետ պայմանագրերի կնքում, այլ ոչ թե այս կամ այն տեխնիկայի ու միջոցների տրամադրում անմիջապես ԱՄՆ-ի զինանոցներից։

Օրենսդիրները նաև դրույթ են ներառել, որի համաձայն Պաշտպանության նախարարությունը պարտավոր է նրանց տեղեկացնել, եթե ԱՄՆ վարչակազմը որոշի չեղարկել կամ կասեցնել Ուկրաինային օգնությունը, որն ավելի վաղ հավանության էր արժանացել Կոնգրեսի կողմից: Այժմ փաստաթուղթը պետք է քննարկվի Սենատում, որից հետո այն լրամշակման կհանձնվի հատուկ հանձնաժողովին: Օրինագծի վերջնական տարբերակը կներկայացվի ԱՄՆ նախագահ Դոնալդ Թրամփի ստորագրությանը։