Դոհայի վրա Իսրայելի հարվածները հանգեցնում են Մերձավոր Արևելքի անկայունացմանը․ Լավրով

Իսրայելի կողմից Կատարի մայրաքաղաքի վրա կատարված հարվածները հանգեցնում են Մերձավոր Արևելքում իրավիճակի հետագա անկայունացմանը։ Այս մասին հայտարարել է Ռուսաստանի արտաքին գործերի նախարար Սերգեյ Լավրովը Ռուսաստան-Պարսից ծոցի համագործակցության խորհրդի ռազմավարական երկխոսության լիագումար նիստում, հաղորդում է ՏԱՍՍ-ը։

«Մեր սեպտեմբերի 11-ի հանդիպումը տեղի է ունենում Մերձավոր Արևելքում ռազմական և քաղաքական լարվածության կտրուկ աճի համատեքստում՝ կապված սեպտեմբերի 9-ին Կատարի մայրաքաղաք Դոհային հասցված Իսրայելի հրթիռային և ռումբային հարվածների հետ», - ասել է Ռուսաստանի արտաքին գործերի նախարարության ղեկավարը։

Լավրովը ընդգծել է, որ ռուսական կողմը խորը մտահոգություն է հայտնում տեղի ունեցողի վերաբերյալ և իրավիճակը համարում է միջազգային իրավունքի կոպիտ խախտում։

Բացի այդ, Ռուսաստանի արտաքին գործերի նախարարը հայտարարել է, որ Դոհայի վրա Իսրայելի կողմից կատարված հարվածը ոտնձգություն է անկախ պետության ինքնիշխանության և տարածքային ամբողջականության նկատմամբ։