Մեծ Բրիտանիայի նոր արտգործնախարարը կայցելի Կիև

Մեծ Բրիտանիայի արտաքին գործերի նախարար Իվետ Քուփերը ուրբաթ օրը կայցելի Կիև, հաղորդում է The Independent-ը։

Հրապարակման համաձայն՝ Քուփերը պաշտոնում նշանակվելուց հետո իր առաջին արտասահմանյան այցի համար ընտրել է Կիևը։

«Ես որոշել եմ այցելել Ուկրաինա արտաքին գործերի նախարարի պաշտոնում իմ առաջին մի քանի օրերին, քանի որ Ուկրաինայի անվտանգությունը կարևոր է Մեծ Բրիտանիայի անվտանգության համար», - ասել է նա։

Նա հավելել է, որ Մեծ Բրիտանիան Ուկրաինային կտրամադրի 142 միլիոն ֆունտ ստեռլինգ օգնություն, որից 100 միլիոն ֆունտ ստեռլինգը կուղղվի ջրամատակարարման և ջեռուցման համակարգերի վերանորոգմանը, իսկ 42 միլիոն ֆունտ ստեռլինգը՝ էլեկտրաէներգիայի ցանցերի, գազի և էներգետիկ ենթակառուցվածքների պաշտպանությանը։