Ռուսաստանի ԱԳՆ-ն սպառնացել է ԵՄ-ին պատասխան միջոցներով, եթե ռուսական ակտիվները բռնագրավվեն

Ռուսաստանը կոշտ կպատասխանի, եթե Եվրամիությունը գողանա սառեցված ռուսական ակտիվները։ Այս մասին հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան, հաղորդում է ՏԱՍՍ-ը։

«Եթե Եվրամիությունը գողանա ռուսական ակտիվները, հետևանքները ամբողջ համաշխարհային ֆինանսական համակարգի համար կլինեն չափազանց բացասական։ Դա աննկատ չի մնա նրանց համար, ովքեր մասնակցում են նման հանցագործության», - ասել է դիվանագետը։

Օգոստոսի վերջին Politico-ն գրել էր, որ Եվրամիությունը քննարկում է Արևմուտքում սառեցված ռուսական ակտիվները «ավելի ռիսկային ներդրումների» վերածելու ծրագրերը՝ դրանցից ավելի մեծ օգուտներ ստանալու համար, որպեսզի ստացված միջոցները ուղղորդվեն Ուկրաինա։

Ներկայումս Եվրոպայում սառեցված է ավելի քան 200 միլիարդ եվրո ռուսական ակտիվ, որոնց մեծ մասը գտնվում է բելգիական Euroclear պահոցում։ Միջոցները դեռևս չեն բռնագրավվել, բայց Բրյուսելը ակտիվներից ստացված շահույթը փոխանցում է Կիևին։