«Ժողովուրդ». ՔՊ-ի ներսում Անահիտ Ավանեսյանի դեմ գործընթացներ են տեղի ունենում

«Ժողովուրդ» օրաթերթը գրում է. ««Ժողովուրդ» օրաթերթի լավատեղյակ աղբյուրները փոխանցում են, որ իշխանության ներսում մի մեծ զանգված աշխատում է, որպեսզի ՀՀ առողջապահության նախարար Անահիտ Ավանեսյանը ՔՊ վարչության անդամ չդառնա: Իշխանական մեր աղբյուրները փոխանցում են, որ մեծ լարվածություն ու դժգոհություն կա Ավանեսյանի շուրջ, ու, կարելի է ասել, մի մեծ բանակ ամեն գնով ցանկանում է խոչընդոտել նրա ներկայությունը ՔՊ կազմում:

Ի հեճուկս դրա՝ Ավանեսյանն էլ շատ ակտիվ քարոզչություն է անում հօգուտ իրեն, մասնակցում է ՔՊ նախաձեռնող նիստերին եւ բոլոր այն միջոցառումներին, որտեղ ներկա է հատկապես Նիկոլ Փաշինյանը:

Ըստ ՔՊ-ականների՝ Ավանեսյանն իրենց հետ որեւէ ձեւով չի պայքարել հեղափոխության օրերին, շատ պասիվ է եղել ու իրավունք չունի ՔՊ վերնախավում լինելու: Բայց, կարծես թե, Ավանեսյանին հաջողվել է «գրավել» Փաշինյանին ու կանաչ ճանապարհ հարթել իր համար:

Կհաջողվի՞ Ավանեսյանին այս իրավիճակում սեպտեմբերի 20-ին ընտրվել նոր վարչության կազմում, թե՞ ոչ. դժվար է ասելը»։