Ռուսական հրթիռները կարող են արագ հասնել Լոնդոն կամ Մադրիդ. ՆԱՏՕ-ի գլխավոր քարտուղար Ռյուտե

Ռուսական հրթիռները կարող են արագ հասնել Լոնդոն կամ Մադրիդ, ուստի համապատասխան սպառնալիքը միայն ՆԱՏՕ-ի արևելյան մասի համար չէ։ Այս մասին հայտարարել է Հյուսիսատլանտյան դաշինքի գլխավոր քարտուղար Մարկ Ռյուտեն մամուլի ասուլիսում, որտեղ հայտարարվել է «Արևելյան պահակ» գործողության մեկնարկի մասին։

«Ընդհանուր առմամբ, գիտեք, ինձ դուր չի գալիս «արևելյան թևի» տեսանկյունից մտածելու այս ամբողջ հայեցակարգը, քանի որ այն տպավորություն է ստեղծում, որ եթե ես ապրում եմ Մադրիդում կամ Լոնդոնում, ապա ես ավելի անվտանգ եմ, քան եթե ապրեի Տալլինում։ Եվ դա ճիշտ չէ։ Որովհետև այս նոր ռուսական հրթիռները թռչում են ձայնի արագությունից հինգ անգամ ավելի արագ, և դրանք կհասնեն Մադրիդ կամ Լոնդոն ընդամենը հինգ կամ տասը րոպե ուշ, քան կհասնեն Տալլին կամ Վիլնյուս», - ասել է Ռյուտեն։

Նրա խոսքով՝ ՆԱՏՕ-ի անդամները պետք է ընկալեն իրավիճակը այնպես, կարծես դաշինքի բոլոր երկրները ապրում են արևելյան թևում։