Պարսից ծոցի երկրները սպառնում են Իսրայելին պատասխանել Կատարի վրա հարձակման համար

Պարսից ծոցի երկրներում աճում է լարվածությունը Իսրայելի վերջին հարձակման հետևանքով, որը թիրախավորել էր Դոհայում ՀԱՄԱՍ-ի քաղաքական ղեկավարության շտաբը։ Կատարի իշխանությունները հայտարարել են «համատեղ տարածաշրջանային պատասխան» մշակելու մասին, իսկ Արաբական Միացյալ Էմիրությունների նախագահ Մոհամմեդ բին Զայեդը ժամանել է Դոհա՝ սկսելով դիվանագիտական այցերի շղթա։ ԵՄԷ-ն նաև կանչել է Իսրայելի դեսպանին՝ հարձակումը որակելով «անամոթ և ստորաքարշ»։

Տարածաշրջանի փորձագետները նշում են, որ Պարսից ծոցի երկրները քննարկում են տարբեր քայլեր՝ սկսած Իսրայելի հետ դիվանագիտական կապերի նվազեցումից մինչև միջազգային դատարաններում դատական գործերի աջակցություն։ Խոսվում է նաև «Peninsula Shield Force»-ի՝ ծոցի երկրների միասնական պաշտպանության համակարգի ակտիվացման մասին։ Սակայն տարածաշրջանի պետությունները մեծապես կախված են ԱՄՆ ռազմական աջակցությունից, ինչը բարդացնում է Իսրայելի դեմ կոշտ պատասխան տալու հնարավորությունները, փոխանցում է CNN-ը։

Բացի ռազմական և քաղաքական ուղղություններից, երկրները քննարկում են տնտեսական լծակների կիրառումը՝ ներառյալ ներդրումային ֆոնդերի միջոցով Իսրայելի հետ առևտրի սահմանափակումը։ Վերլուծաբանների կարծիքով՝ Իսրայելի գործողությունները կարող են ստիպել ծոցի երկրների առաջնորդներին վերանայել իրենց հարաբերությունները ԱՄՆ-ի և տարածաշրջանի անվտանգության ռազմավարության հետ՝ պահանջելով հստակ և ամուր երաշխիքներ։