Չինաստանը բողոքել է ԱՄՆ-ի՝ բարձր տեխնոլոգիաների զարգացմանը խոչընդոտելու փորձերից

Չինաստանի առևտրի նախարարությունը հայտարարել է, որ ԱՄՆ սահմանափակող քայլերը՝ ուղղված չիպերի և արհեստական ինտելեկտի ոլորտներին, դիտարկվում են որպես փորձ՝ խաթարելու Չինաստանի բարձր տեխնոլոգիաների զարգացումը։ Պեկինը շեշտել է, որ այս գործողությունները ոչ միայն վնասում են Չինաստանի շահերին, այլև սպառնում են գլոբալ մատակարարման շղթայի կայունությանը։

Հայտարարությունը հնչել է այն ֆոնին, երբ Չինաստանը սկսել է հակադեմպինգային քննություն ԱՄՆ-ում արտադրված որոշ անալոգային միկրոշղթաների ներմուծման վերաբերյալ։ Քննությունը նախատեսվում է ավարտել 2026 թվականի սեպտեմբերի 13-ին։ Մինչ այդ, ՉԺՀ փոխվարչապետ Հե Լիֆենը Իսպանիայում նախատեսված հանդիպումների շրջանակում քննարկումներ կունենա ամերիկյան կողմի հետ առևտրի, սակագների և TikTok հարթակի շուրջ։

Ավելի վաղ Financial Times-ը հայտնել էր, որ Վաշինգտոնը պատրաստվում է ճնշում գործադրել ԵՄ-ի և «Մեծ յոթնյակի» երկրների վրա՝ Ռուսաստանից Չինաստանի նավթի գնումների պատճառով։ Այս լարվածության ֆոնին ԱՄՆ նախագահ Դոնալդ Թրամփը հայտարարել էր, որ դժգոհ է ՌԴ նախագահ Վլադիմիր Պուտինի գործողություններից։