Իրաքի վարչապետը կոչ է արել ստեղծել իսլամական երկրների ռազմական դաշինք

Իրաքի վարչապետը, անդրադառնալով Իսրայելի կողմից Կատարի վրա հարձակմանը, ասել է, որ իսլամական երկրների կողմից ռազմական դաշինքի ստեղծման համար որևէ խոչընդոտ չկա։

Ինչպես հաղորդում է Tasnim News-ը՝ Fars լրատվական գործակալությանը հղումով, Իրաքի վարչապետ Մոհամմեդ Շիա ալ-Սուդանն Al Jazeera-ին տված հարցազրույցում ընդգծել է, որ Կատարի վրա Իսրայելի հարձակումը համարվում է լուրջ սպառնալիք այս երկրի և ամբողջ տարածաշրջանի անվտանգության համար։

Նա այս գործողությունը անվանել է միջազգային նորմերի և իրավունքների ակնհայտ խախտում՝ հավելելով, որ Իսրայելի հարձակումը ցույց է տալիս այս ռեժիմի հարձակողական և հանցավոր մոտեցումը։

Խոսելով Գազայի հատվածում ստեղծված իրավիճակի մասին՝ նա ասել է, որ Իսրայելի վերջին երկու տարիների գործողությունները կազմակերպված կոտորած են։ Իրաքի վարչապետը նաև ընդգծել է իսլամական երկրների միջև քաղաքական, ռազմական և տնտեսական դաշինք ստեղծելու անհրաժեշտությունը՝ ասելով, որ տարածաշրջանի երկրների պաշտպանության նպատակով համատեղ իսլամական անվտանգության ուժերի ստեղծման համար որևէ խոչընդոտ չկա։

Այնուհետև նա նշել է, որ Իրաքն ունի մի քանի լծակներ և տարբերակներ այդ հարձակումներին հակազդելու համար՝ ընդգծելով, որ սպառնալիքները չեն սահմանափակվի միայն Կատարով, այլ որ այս հարձակողական մոտեցմանը պետք է հակազդել։

Այս երկուշաբթի Դոհայում տեղի կունենա արաբա-իսլամական արտակարգ գագաթնաժողով՝ Կատարի վրա Իսրայելի հարձակումը քննարկելու համար։