Գազայի ժողովուրդը չի կարող խաղաղություն ունենալ առանց ՀԱՄԱՍ–ի զինաթափման․ ԱՄՆ պետքարտուղար

ԱՄՆ պետքարտուղար Մարկո Ռուբիոն հայտարարել է, որ Մերձավոր Արևելքում խաղաղության հասնելու համար անհրաժեշտ է ոչնչացնել ՀԱՄԱՍ–ի զինված թևը։ Նա այս մասին ասել է Իսրայելի վարչապետ Բենիամին Նեթանյահուի հետ հանդիպումից հետո տեղի ունեցած մամուլի ասուլիսի ժամանակ։

«Պետք է վերջ դնել սրան։ Ինչպե՞ս է այն (հակամարտությունը - խմբ․) ավարտվելու։ Այն կավարտվի այն մարդկանց վերացմամբ, ովքեր իրագործել են դա։ Այն կավարտվի բոլոր պատանդների՝ թե՛ կենդանի, թե՛ մահացածների ազատ արձակմամբ», - ասել է պետքարտուղարը՝ ընդգծելով, որ ՀԱՄԱՍ–ը չի կարող շարունակել գոյություն ունենալ որպես զինված տարր, որը սպառնում է ոչ միայն Իսրայելի, այլև ամբողջ աշխարհի խաղաղությանը և կայունությանը։

Ռուբիոն նաև դատապարտել է ՀԱՄԱՍ–ի «աննախադեպ բարբարոսությունը» և հայտարարել, որ Գազայի ժողովուրդը չի կարող խաղաղություն կամ ավելի լավ ապագա ունենալ առանց կազմակերպության զինաթափման և բոլոր պատանդների տուն վերադարձի: Միևնույն ժամանակ, Միացյալ Նահանգները չի սպասում, որ ՀԱՄԱՍ–ը կամավոր կերպով վայր կդնի զենքը: Պետքարտուղարը կարծիք է հայտնել, որ կազմակերպության վերացման համար կարող է անհրաժեշտ լինել կարճաժամկետ ռազմական գործողություն: