Google-ի մայր ընկերության արժեքը հասել է ռեկորդային 3 տրիլիոնի ԱՄՆ դոլարի

Google-ի մայր ընկերությունը՝ Alphabet-ը, առաջին անգամ շուկայական կապիտալիզացիայով անցել է $3 տրիլիոնի սահմանը։ Այս աճը պայմանավորված է արհեստական բանականության ոլորտի նկատմամբ ներդրողների վստահությամբ և ԱՄՆ դատարանի որոշմամբ, որով ընկերությունը պահպանեց վերահսկողությունը Chrome բրաուզերի և Android համակարգի նկատմամբ՝ խուսափելով դրանց բաժանումից։

Alphabet-ի բաժնետոմսերը աճել են շուրջ 3,5 տոկոսով՝ հասնելով պատմական առավելագույնի։ Այս տարի ընկերության բաժնետոմսերի արժեքը աճել է ավելի քան 32 տոկոսով՝ առաջ անցնելով «Հրաշալի յոթնյակի» մյուս տեխնոհսկաներից և S&P 500 ինդեքսի աճից։ Alphabet-ը միացել է Apple-ին և Microsoft-ին՝ հաղթահարելով $3 տրիլիոն շուկայական շեմը, իսկ Nvidia-ն շարունակում է մնալ առաջատար՝ $4,25 տրիլիոն կապիտալիզացիայով։

Աճի կարևոր գործոններից է եղել նաև ընկերության ամպային ծառայությունների 32 տոկոս եկամտային աճը՝ Gemini AI մոդելի և սեփական չիպերի ներդրումների շնորհիվ։ Վերլուծաբանների կարծիքով՝ Alphabet-ը դադարել է դիտվել որպես պարզապես որոնողական հարթակ, իսկ YouTube-ի, Waymo-ի և այլ նախագծերի զարգացումը ներդրողներին հուշում է, որ ընկերությունը դուրս է գալիս ավանդական բիզնեսի սահմաններից։