Կադիրովի 17-ամյա որդին ցուցադրել է գրեթե կես միլիոն դոլար արժողությամբ ժամացույցը

Չեչնիայի ղեկավար Ռամզան Կադիրովի 17-ամյա որդին՝ Ադամը, հանրության առջև հայտնվել է ժամացույցով, որի արժեքը գերազանցում է 496 հազար դոլարը (41 միլիոն ռուբլի): Ադամի լուսանկարը, որի ձեռքին երևում է այդ թանկարժեք աքսեսուարը, հրապարակել է նրա քույրը՝ Տաբարիկը, իր Instagram էջում։

Հրապարակված կադրում Կադիրովի որդին նկարվել է ամերիկյան Jacob & Co ընկերության Epic SF24 շարքի ժամացույցով։ Հայտնի է, որ ժամացույցը պատրաստված է 18 կարատ սպիտակ ոսկուց, պատյանը զարդարված է 104 ադամանդով, իսկ մեխանիզմը պաշտպանված է շափյուղա ապակով։ Epic SF24 շարքի ընդամենը 18 օրինակ է արտադրվել, և այս պահին դրանք ամբողջությամբ վաճառված են։

Մինչ այդ Ադամ Կադիրովը ներկա էր Կաբարդինո-Բալկարիայի ղեկավարի պարգևատրման արարողությանը՝ ոսկե ատրճանակով։ Ռամզան Կադիրովի Telegram–ալիքում հրապարակված կադրերում երևում է, թե ինչպես է երիտասարդը ստանում «Կաբարդինո-Բալկարիայի Հանրապետությանը մատուցած ծառայությունների համար» շքանշանը, իսկ նրա գոտկատեղին՝ թեւնոցում, տեսանելի է ոսկե ատրճանակ։

17-ամյա Ադամ Կադիրովը հանդիսանում է Չեչնիայի ղեկավարի՝ իր հոր՝ Ռամզան Կադիրովի օգնականը։ 2023 թվականի նոյեմբերից նա ղեկավարում է տարածաշրջանի ղեկավարի Անվտանգության ծառայությունը։ Նույն թվականի հոկտեմբերին Ադամին շնորհվել է Չեչենական Հանրապետության Հերոսի կոչումը, իսկ 2024 թվականի օգոստոսին նրան հանձնել են ամենաբարձր տարածաշրջանային պարգևը՝ Կադիրովի շքանշանը։ Չեչնիայի ղեկավարի ժառանգն ունի նաև բազմաթիվ այլ պարգևներ։

Թարգմանությունը՝ Lurer.com-ի