Կիանու Ռիվզը գաղտնի ամուսնացել է

Կանադացի դերասան Կիանու Ռիվզը գաղտնի ամուսնացել է իր սիրելիի՝ նկարիչ Ալեքսանդրա Գրանտի հետ։ Radar Online-ի փոխանցմամբ՝ զույգի հարսանիքը կայացել է այս ամռանը Եվրոպայում ճանապարհորդության ընթացքում։ 61-ամյա Ռիվզն ու 52-ամյա Գրանտը որոշել են պահել արարողությունը փակ, քանի որ երկուսն էլ բարձր են գնահատում անձնական տարածքը։

Ամուսնության լուրը մեծ արձագանք է գտել, քանի որ Ռիվզը մինչ այժմ երբեք չի եղել ամուսնացած։ Ըստ ընկերների՝ Գրանտը դարձել է դերասանի ամենամեծ աջակցությունը՝ նրա կյանքի ցավալի կորուստներից հետո։ Հիշեցնենք, որ 1999-ին Ռիվզի նախկին սիրելին՝ Ջեննիֆեր Սայմը, ծննդաբերել է մեռած աղջիկ, իսկ երկու տարի անց զոհվել ավտովթարից, հայտնում է Лента.ру-ն։

Հոլիվուդյան աստղի անձնական կյանքի շուրջ հետաքրքրությունը կրկին աճել է, երբ միաժամանակ հայտնի դարձավ, որ Ռիվզը վերադառնալու է «Կոնստանտին» ֆիլմի նոր սիկվելում։ Նշվում է, որ սպասվող շարունակությունը լինելու է ավելի մռայլ ու սարսափեցնող, քան առաջին մասը։