Ֆրանսիայում զանգվածային բողոքի ցույցեր կանցկացվեն

Հարյուր հազարավոր մարդիկ հինգշաբթի օրը դուրս կգան Ֆրանսիայի ողջ տարածքում հերթական զանգվածային ցույցերի՝ ի նշան խիստ խնայողության միջոցների դեմ բողոքի, որոնք կառավարությունն առաջարկել է բյուջետային դեֆիցիտի և հսկայական պետական պարտքի ֆոնին:

Ակցիաները կանցկացվեն տարբեր ոլորտների աշխատողներին ներկայացնող արհմիությունների կոչով։

Այսպես, պիկետների դուրս կգան տրանսպորտի և էներգետիկայի ոլորտի աշխատակիցները, կրթության և առողջապահության ոլորտի աշխատակիցները, ֆերմերները և նույնիսկ հրշեջները: Գործադուլի պատճառով՝ Ֆրանսիայի ողջ տարածքում հասարակական տրանսպորտի աշխատանքում խիստ խափանումներ են սպասվում, երկրում դեղատների ավելի քան 90 %-ը կփակվի:

Սա բողոքի առաջին ալիքը չէ խիստ խնայողության միջոցների դեմ։ Անցած չորեքշաբթի «արգելափակենք ամեն ինչ» կարգախոսով զանգվածային ցույցերին միացել է շուրջ 200 000 մարդ: Հարյուրավոր ցուցարարներ ձերբակալվել են այն բանից հետո, երբ որոշ ակցիաներ վերածվել են ոստիկանության հետ բախումների:

Սակայն այս անգամ բողոքի ցույցերը շատ ավելի լայն թափ կստանան։ Ֆրանսիայի ՆԳՆ տվյալներով՝ նրանց կմիանա մոտ 800 000 մարդ։ Իշխանությունները մտավախություն ունեն, որ արհմիությունների խաղաղ ցույցերի հետ մեկտեղ՝ քաղաքների փողոցներում կարող են անկարգություններ լինել: ՆԳՆ ղեկավարի պաշտոնակատար Բրյունո Ռետայոն հայտարարել է, որ ցույցերի ժամանակ սպասվում է մինչև 10 000 մարդու ներկայություն, որոնք մտադիր են ջարդեր կազմակերպել: Այս ֆոնին իրավակարգի ապահովման համար իշխանությունները կներգրավեն ավելի քան 80 000 իրավապահներ և կօգտագործեն հատուկ տեխնիկական միջոցներ, այդ թվում՝ դրոններ, ջրցան մեքենաներ և նույնիսկ զրահատեխնիկա: