ԵՄ պաշտոնյան այցելել է Ակնա․ Ալիևի հետ քննարկել են Ադրբեջանի և Եվրամիության միջև հարաբերությունները

Ադրբեջանը կշարունակի տարածաշրջանում խաղաղության օրակարգի առաջխաղացմանն ուղղված իր ջանքերը։

Ըստ APA-ի, նախագահ Իլհամ Ալիևը այս մասին հայտարարել է սեպտեմբերի 18-ին ԵՄ ընդլայնման հարցերով հանձնակատար Մարտա Կոսի հետ ընդունելության ժամանակ։

Ընդգծելով տարածաշրջանում տրանսպորտային կապերի զարգացման «հիանալի հնարավորությունները»՝ Ալիևը նշել է, որ Ադրբեջանը ինտենսիվ աշխատում է «ազատագրված տարածքներում» ճանապարհային և տրանսպորտային ենթակառուցվածքների կառուցման ուղղությամբ։ Այս առումով նա ընդգծել է Զանգիլան տանող ճանապարհային և երկաթուղային գծերի կարևորությունը։

Ավելի ուշ Մարտա Կոսը X–ի իր էջում գրել է, որ քննարկվել են Ադրբեջանի և Եվրամիության միջև հարաբերությունները։

«Այսօր Բաքվում մենք արդյունավետ և բաց քննարկումներ ունեցանք նախագահ Իլհամ Ալիևի հետ։ Մասնավորապես, մենք մտքեր փոխանակեցինք փոխգործակցության հետ կապված հարցերի շուրջ։ Ես նաև շնորհավորեցի նախագահին Վաշինգտոնում խաղաղության համաձայնագրի նախաստորագրման կապակցությամբ։ Եվրամիությունը աջակցում է տարածաշրջանում կայուն խաղաղությանը և պատրաստ է մասնակցել այս գործընթացին», - նշել է Մարտա Կոսը իր գրառման մեջ։

Նշենք, որ ԵՄ ընդլայնման հարցերով հանձնակատարը նաև այցելել է օկուպացված Ակնա, հետևել իրականացվող նախագծերին և ականազերծման աշխատանքներին։