Nvidia-ն 5 միլիարդ ԱՄՆ դոլար է ներդնում Intel-ում՝ դառնալով խոշոր բաժնետեր և գործընկեր

Nvidia-ն հայտարարել է 5 միլիարդ դոլարի ներդրման մասին Intel-ում, ինչի արդյունքում կստանա ընկերության շուրջ 4%-ը և կդառնա նրա խոշոր բաժնետերերից մեկը։ Գործարքը հաջորդեց ԱՄՆ կառավարության՝ Intel-ում 10% բաժնետոմս ձեռք բերելու որոշմանը։ Այս քայլը դիտվում է որպես աջակցություն դժվար իրավիճակում գտնվող ամերիկյան չիպարտադրողին, որի բաժնետոմսերը միանգամից թռիչք արձանագրեցին։

Ընկերությունները նախատեսում են համատեղ մշակել մի քանի սերնդի չիպեր՝ թե՛ անձնական համակարգիչների, թե՛ տվյալների կենտրոնների համար։ Համագործակցությունը չի ներառի Intel-ի արտադրական հզորությունների («foundry») օգտագործումը Nvidia-ի համար, սակայն այն կարող է երկարաժամկետ սպառնալիք դառնալ TSMC-ին և AMD-ին։ Գործարքի լուրը շուկան արագ արձագանքեց․ Intel-ի բաժնետոմսերը աճեցին 26%-ով՝ հասնելով $31.33-ի, իսկ AMD-ի բաժնետոմսերը նվազեցին 4.6%-ով։

Վերլուծաբանները նշում են, որ այս համաձայնագիրը ոչ միայն ամրապնդում է Nvidia-ի դիրքերը ԱՄՆ-ում՝ քաղաքական աջակցություն ստանալու տեսանկյունից, այլ նաև նոր շանս է տալիս Intel-ին վերադառնալ առաջատարների շարքը։ Համատեղ մշակված նոր պրոցեսորները, որոնք կօգտագործեն Nvidia-ի GPU-ները և Intel-ի CPU-ները արագացված կապերով, կարող են լուրջ մրցակցություն առաջացնել թե՛ AMD-ի, թե՛ Broadcom-ի համար, հայտնում է Reuters-ը։