Լեհաստանի ՆԳՆ-ն հայտնել է սահմանի մոտ անօդաչու թռչող սարքերի նոր ակտիվության մասին

Սեպտեմբերի 18-ի գիշերը անօդաչու թռչող սարքերը, ենթադրաբար, փորձել են հատել Լեհաստանի սահմանը։ Այս մասին Լուբանում տեղի ունեցած մամուլի ասուլիսում հայտարարել է Լեհաստանի ներքին գործերի նախարար Մարչին Կերվինսկին։ Նրա խոսքերը հաղորդել է Onet պորտալը։

Մամուլի ասուլիսում նրան հարցրել են Բելառուսի հետ սահմանի փակման մասին։ Կերվինսկին հիշեցրել է, որ այն փակվել է «Զապադ-2025» զորավարժությունների պատճառով և կվերաբացվի «միայն այն ժամանակ, երբ վստահություն լինի, որ սադրանքներ չեն լինի»։

Նրա խոսքով՝ լեհ-բելառուսական սահմանին իրավիճակը մնում է «շատ, շատ լարված»։

«Օրինակ, երեկ գիշեր սահմանապահ ծառայությունը գրանցել է բելառուսական և ռուսական անօդաչու թռչող սարքերի ակտիվության աճ, որոնք փորձում են հատել Լեհաստանի օդային տարածքը», - հավելել է ներքին գործերի նախարարը։