Ռուսաստանում դիզվառելիքի գինը հասել է ռեկորդային մակարդակի

Սեպտեմբերի 19-ին Սանկտ Պետերբուրգի բորսայի տվյալներով՝ դիզվառելիքի արժեքը առաջին անգամ 2023-ից բարձրացել է 70 հազար ռուբլուց՝ հասնելով 70 358-ի մեկ տոննայի համար։ Գնաճը գրանցվել է մատակարարումների համար, որոնք նախատեսված են Ռուսաստանի եվրոպական մասում։ Միևնույն ժամանակ Սիբիրի և Հեռավոր Արևելքի ուղղություններով չորս օր շարունակ վաճառք չի եղել, իսկ Ուրալ–Սիբիր տարածաշրջանում վաճառքների բացակայությունը արձանագրվել է առաջին անգամ, հայտնում է Лента.ру-ն։

Այս ամսվա սկզբից դիզվառելիքը թանկացել է մոտ 10 հազար ռուբլով կամ գրեթե 15 տոկոսով, ինչը ամենասուր աճն է 2024-ի ձմեռվանից հետո։ Վառելիքի պատմական առավելագույն գինը գրանցվել էր երկու տարի առաջ՝ 2023-ի սեպտեմբերի 19-ին, երբ մեկ տոննան վաճառվում էր 75 036 ռուբլիով։ Այդ ժամանակ կառավարությունը կարողացավ զսպել շուկան՝ դիզվառելիքի արտահանման ամբողջական արգելքի միջոցով, մինչդեռ այժմ նման սահմանափակումներ չկան։

Վերլուծաբանները շեշտում են, որ իրավիճակը սրվում է նաև նավթավերամշակման գործարանների վրա անօդաչուների հարվածների հետևանքով։ Արդյունքում գործարանները հարկադրված անցնում են արտահերթ վերանորոգումների, իսկ նավթամթերքների ծովային արտահանումը սեպտեմբերի առաջին կեսին տարեկան կտրվածքով կրճատվել է 18 տոկոսով՝ մինչև 3,3 միլիոն տոննա։ Վերջերս հարվածներ էր ստացել նաև Լենինգրադի մարզի Պրիմորսկ նավահանգիստը։