ՆԱՏՕ-ն ուժեղացնում է ներկայությունը Լեհաստանում․ Տուսկը հրապարակել է դաշնակիցների ցուցակը

Լեհաստանի վարչապետ Դոնալդ Տուսկը հայտարարել է, որ ՆԱՏՕ-ի «Արևելյան պահակ» գործողությանը Լեհաստանում արդեն միացել են տասը պետություններ։ Վարչապետը նշել է, որ քայլը հետևում է դրոնային հարձակման դեպքից հետո և նպատակ ունի ապահովելու Լեհաստանի պաշտպանունակությունը։

Տուսկի խոսքով՝ լրացուցիչ աջակցություն ցուցաբերելու պատրաստակամություն են հայտնել Ֆրանսիան, Մեծ Բրիտանիան, ԱՄՆ-ը, Գերմանիան, Նիդեռլանդները, Շվեդիան, Նորվեգիան, Չեխիան, Պորտուգալիան և Իտալիան։ Նա ընդգծել է, որ դաշնակիցների համատեղ գործողությունները կարևոր ուղերձ են անվտանգության ոլորտում, գրում է Лента.ру-ն։

Մոսկվան, սակայն, բացասաբար է արձագանքել զարգացումներին։ ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Լեհաստանի միջադեպը օգտագործվում է Ռուսաստանի դեմ «դեմոնիզացիայի» համար։ Նրա խոսքով՝ Մոսկվայի հասցեին հնչեցվող մեղադրանքները հիմնավոր չեն, քանի որ որևէ ապացույց «զարգացումների դիտավորության» մասին ներկայացված չէ։