Սամարայի մարզում դրոնային հարձակման հետևանքով զոհվել է 4 մարդ

Սամարայի մարզում գիշերային դրոնային հարձակման հետևանքով զոհվել է չորս քաղաքացի։ Տեղեկությունը հայտնել է մարզի նահանգապետ Վյաչեսլավ Ֆեդորիշևը՝ նշելով, որ տուժած ընտանիքներին կտրամադրվի ամբողջ անհրաժեշտ աջակցությունը, ներառյալ ֆինանսական օգնությունը։ Մեկ վիրավոր ներկայումս գտնվում է բժիշկների հսկողության տակ։

Ֆեդորիշևի խոսքով՝ հարձակումը գրանցվել է սեպտեմբերի 20-ի առավոտյան, իսկ թիրախ են դարձել վառելիքաէներգետիկ համալիրի օբյեկտները։ Նահանգապետը վստահեցրել է, որ իշխանությունները կապի մեջ են բոլոր տուժածների ընտանիքների հետ, հայտնում է Лента.ру-ն։

ՌԴ Պաշտպանության նախարարությունը հաղորդել է, որ նույն գիշեր ռուսական ՀՕՊ համակարգերը ոչնչացրել են ընդհանուր առմամբ 149 ուկրաինական անօդաչու։ Դրանք խոցվել են մի շարք շրջանների երկնքում, այդ թվում՝ Ռոստովի, Սարատովի, Բրյանսկի, Սամարայի մարզերում, ինչպես նաև Կրիմում, Վոլգոգրադում, Բելգորոդում, Վորոնեժում և Կալուգայում։