Ամբանի ընտանիքի կենդանաբանական կենտրոնը հայտնվել է միջազգային վեճի կենտրոնում

Spix-ի մակաո թութակը, որը 2019-ին հայտարարվել էր վայրի բնության մեջ վերացված, դարձել է միջազգային դիվանագիտական վեճի պատճառ։ Reuters-ի տեղեկացմամբ՝ Բրազիլիան մտահոգություն է հայտնել, որ թռչունների մի մասը տեղափոխվել է Հնդկաստան՝ Ամբանի ընտանիքի մասնավոր կենդանաբանական կենտրոն Vantara, առանց իր համաձայնության։

Vantara-ն, որը գտնվում է Գուջարաթում և զբաղեցնում է շուրջ 3,500 ակր տարածք, հայտարարում է, որ պահպանում է մոտ 2,000 կենդանատեսակ։ Ըստ մաքսային տվյալների՝ կենտրոնը 2023-ին Գերմանիայից ստացել է 26 Spix-ի մակաո, սակայն Բրազիլիայի կենսաբազմազանության պահպանության ինստիտուտը պնդում է, որ Հնդկաստանը չի ընդգրկված թռչունների պահպանման միջազգային ծրագրում, հետևաբար նման տեղափոխումը հարցեր է առաջացնում։

Հնդկաստանի Գերագույն դատարանը վերջերս հետաքննություն անցկացրեց և հայտարարեց, որ Vantara-ի գործունեության մեջ խախտումներ չեն հայտնաբերվել։ Սակայն Բրազիլիան, Գերմանիան և Հնդկաստանը շարունակում են բանակցել Կենդանիների միջազգային առևտրի մասին կոնվենցիայի (CITES) հարթակում։ Այս ընթացքում ԵՄ պաշտոնյաները հայտարարել են, որ առավել ուշադիր են լինելու Հնդկաստան ուղղվող էկզոտիկ կենդանիների արտահանման բոլոր դիմումների նկատմամբ։