Հնդկաստանը 33 անգամ ավելացրել է մսի մատակարարումները Ռուսաստան

Հուլիսին Հնդկաստանը կտրուկ ավելացրել է մսի արտահանումը Ռուսաստան՝ մատակարարելով 21,2 մլն դոլարի ծավալով։ Դա նախորդ տարվա համեմատ կազմում է 33-ապատիկ աճ, հայտնում է РИА Новости-ն։ 2024-ին նույն ժամանակահատվածում ցուցանիշը կազմում էր ընդամենը 640 հազար դոլար։

Ընդհանուր հաշվարկով՝ 2025-ի առաջին յոթ ամիսներին Հնդկաստանից մսի արտահանումը Ռուսաստան կազմել է 62,8 մլն դոլար, ինչը 2,6 անգամ ավելի է, քան մեկ տարի առաջ։ Միևնույն ժամանակ, հուլիսին Հնդկաստանի ընդհանուր մսի արտահանումը աշխարհին հասել է 401 մլն դոլարի, հիմնական գնորդներն էին Վիետնամը (81 մլն), Մալայզիան (54 մլն) և Արաբական Միացյալ Էմիրությունները (37 մլն)։ Ռուսաստանը գնորդ երկրների ցուցակում զբաղեցրել է յոթերորդ տեղը։

Աճ է արձանագրվել նաև Բրազիլիայից մսի մատակարարումներում․ օգոստոսին Ռուսաստան է ներմուծվել 67,6 մլն դոլարի բրազիլական միս, ինչը 2017-ից ի վեր ամենաբարձր ցուցանիշն է։ Նախորդ տարվա համեմատ ներկրումը աճել է 1,6 անգամ՝ հիմնականում խոշոր եղջերավոր անասունների մսի մատակարարումների կրկնապատկման հաշվին։