ԱՄՆ պահանջները կարող են կրկնել 1997-ի ճգնաժամը. Հարավային Կորեայի նախագահ

Հարավային Կորեայի նախագահ Լի Ջե Մյոնը Reuters-ին տված հարցազրույցում հայտարարել է, որ ԱՄՆ-ի ներկայիս պահանջների կատարումը կարող է երկիրը կանգնեցնել ֆինանսական ճգնաժամի եզրին՝ համադրելի 1997 թվականի կոլապսի հետ։ Վաշինգտոնը պայմանավորվել էր տուրքերի նվազեցման դիմաց Սեուլից ստանալ 350 միլիարդ դոլարի ներդրում, սակայն համաձայնագիրը դեռ չի ստորագրվել։ Լիի խոսքով՝ առանց արժութային փոխանակման գծի նման գումարը «կանխիկով հանել ու ԱՄՆ-ում ներդնելը» կդառնա շոկային հարված երկրի տնտեսությանը։

Նախագահը ընդգծել է, որ առայժմ հիմնական խոչընդոտը ներդրումների առևտրային իրագործելիության երաշխիքների բացակայությունն է։ Նրա խոսքով՝ առաջարկվող պայմանները չեն ապահովում տնտեսական ողջամտություն, մինչդեռ Թրամփի վարչակազմը պնդում է, որ հենց Վաշինգտոնն է վերահսկելու ներդրումների ուղղությունները։ Միևնույն ժամանակ Լին հայտարարել է, որ ԱՄՆ-ի հետ դաշնակցային հարաբերությունները մնում են առանցքային և պետք է «վերադարձվեն ողջախոհության դաշտ»։

Լին անդրադարձել է նաև Hyundai գործարանում հարավկորեացի աշխատողների զանգվածային ձերբակալությանը, նշելով, որ դա չի եղել Թրամփի անձնական հրահանգը։ Նա շեշտել է, որ ԱՄՆ-ը ներողություն է խնդրել միջադեպի համար։ Ինչ վերաբերում է արտաքին մարտահրավերներին՝ Հարավային Կորեայի նախագահը մտահոգություն է հայտնել Չինաստան–Ռուսաստան–Հյուսիսային Կորեա առանցքի ամրապնդմամբ և նշել, որ Սեուլը պետք է գտնվի խաղաղ գոյակցության ուղի՝ խուսափելով «վտանգավոր հակամարտության սահմանագծից»։