ԵՄ–ն մոտ 23 միլիոն եվրո կհատկացնի Ադրբեջանին

Եվրոպական հանձնաժողովի կայքում հրապարակվել է հայտարարություն՝ ԵՄ հանձնակատար Մարթա Կոսի՝ Հարավային Կովկաս կատարած այցից հետո։

Հայտարարության մեջ ասվում է. «Երեկ ԵՄ ընդլայնման հարցերով հանձնակատար Մարտա Կոսն ավարտեց իր այցը Ադրբեջան և Հայաստան՝ վերահաստատելով ԵՄ-ի հանձնառությունը Հարավային Կովկասում խաղաղության, կայունության և տնտեսական զարգացման ուղղությամբ»։

Նշվում է, որ ԵՄ-ն ձգտում է ամրապնդել կապերը երկու երկրների հետԼ

Հանձնակատար Մարթա Կոսը նշել է. «ԵՄ-ն վճռականորեն աջակցում է Հայաստանի և Ադրբեջանի միջև կարգավորման գործընթացին և պատրաստ է ներդրումներ կատարել տարածաշրջանային կապի մեջ։ Բացելով առևտրային ուղիներ, կապելով ենթակառուցվածքները և միավորելով մարդկանց՝ մենք կարող ենք այսօրվա հնարավորությունները վերածել երկարատև խաղաղության և համատեղ բարգավաճման։ Իմ այցի ընթացքում արված հայտարարությունները հաստատում են այս տեսլականը կոնկրետ ռեսուրսներով՝ վերջին դիվանագիտական ​​հաջողությունները վերածելով ամբողջ տարածաշրջանի համար շոշափելի արդյունքների»։

Ադրբեջանում հանձնակատար Կոսը համաձայնվել է ստեղծել բարձր մակարդակի աշխատանքային խումբ՝ ԵՄ-ի և Ադրբեջանի միջև տնտեսական համագործակցությունը ամրապնդելու և «Գլոբալ դարպաս» նախաձեռնության շրջանակներում ներդրումները խթանելու համար։ Նա նաև հայտարարել է ականներից տուժած տարածքներին հետագա աջակցություն ցուցաբերելու իր մտադրության մասին։ «Եվրոպայի թիմ» նախաձեռնության շրջանակներում ԵՄ-ն և նրա անդամ պետությունները մինչև 23 միլիոն եվրո կհատկացնեն Ադրբեջանում մարդասիրական ականազերծման աշխատանքներին։