Չինական BYD-ն արագ ընդլայնվում է Իսպանիայում

Չինական BYD ավտոարտադրողը շարունակում է կտրուկ ընդլայնել դիրքերը Իսպանիայում՝ գրավելով գնորդներին էժան էլեկտրական մեքենաներով և հզոր դիլերային ցանցով։ Հուլիսին ընկերության մասնաբաժինը Իսպանիայի էլեկտրամոբիլների շուկայում հասել է 10 տոկոսի, ինչը կրկնակի է եվրոպական միջին ցուցանիշից և երեք անգամ գերազանցում է Tesla-ին։

BYD-ի դիլերային ցանցը Իսպանիայում մեկ տարում աճել է չորս անգամ՝ հասնելով գրեթե 100 կետերի։ Մասնագետները նշում են, որ երկրի ավտոարտադրության սեփական հզոր բրենդի բացակայությունը հեշտացնում է չինական ընկերությունների մուտքը։ Ընկերության վաճառքները աճել են 675 տոկոսով՝ մինչև 14 հազար մեքենա միայն այս տարվա ութ ամիսների ընթացքում, հայտնում է Reuters-ը։

BYD-ն արդեն կառուցում է գործարան Հունգարիայում և նախատեսում է առաջիկա երեք տարում ամբողջ եվրոպական արտադրությունը տեղայնացնել։ Իսպանիան դիտվում է որպես հարմար հարթակ՝ արդյունաբերական ենթակառուցվածքի և համեմատաբար էժան էլեկտրաէներգիայի շնորհիվ։ Սակայն փորձագետները նշում են, որ սահմանափակ լիցքավորման ենթակառուցվածքը դեռ խոչընդոտում է էլեկտրոմոբիլների լայն տարածմանը։