Ճապոնիայում կոչ են անում պահպանել մշակութային կապերը Ռուսաստանի հետ

Nippon Foundation բարեգործական հիմնադրամի ղեկավար Յոհէի Սասակավան Մոսկվայում հանդես է եկել հայտարարությամբ, ըստ որի՝ Ռուսաստանն ու Ճապոնիան պետք է շարունակեն ոչ պետական փոխանակումները՝ անկախ քաղաքական լարվածությունից։

«Մեր երկրները հարևաններ են, ուստի չափազանց կարևոր է զարգացնել կրթական, մշակութային և արվեստի ոլորտների համագործակցությունը, նույնիսկ եթե պետական մակարդակով հարաբերությունները բարդանում են», — նշել է Սասակավան։

Նրա խոսքով՝ հակասությունները հավերժ չեն կարող տևել, և հենց մասնավոր կապերն են, որ կարող են հիմք դառնալ երկկողմ հարաբերությունների աստիճանական կարգավորման համար։ Ավելի վաղ The Mainichi թերթը գրել էր, որ Տոկիոյի համար կարևոր է վերականգնել կապերը Մոսկվայի հետ՝ գազի ներմուծման և ձկնորսական ոլորտում համագործակցության ապահովման նպատակով։