Երկրի միջուկի սահմանին խորհրդավոր տեղաշարժ է հայտնաբերվել

Գուստավ Էյֆելի անվան համալսարանի (Փարիզ) ֆրանսիացի երկրաֆիզիկոսները Երկրի խորքում հայտնաբերել են անսովոր զանգվածի տեղաշարժ։ Այն տեղի է ունեցել 2006-2008 թվականների միջև ընկած ժամանակահատվածում՝ միջուկ-մանտիա սահմանին, մոտավորապես երեք հազար կիլոմետր խորության վրա։ Հայտնագործությունը նկարագրված է Geophysical Research Letters ամսագրում։

Ուսումնասիրությունը հիմնված է ամերիկա-գերմանական GRACE արբանյակային առաքելության տվյալների վրա։ Գիտնականների խոսքով՝ Երկրի ներքին շերտում հայտնաբերված զանգվածի տեղաշարժը վկայում է ապարների, մասնավորապես՝ պերովսկիտների կառուցվածքում հնարավոր փոխակերպումների մասին։

Այս հանքանյութերը ձևավորվում են ծայրահեղ ճնշման տակ և վաղուց համարվում են ստորին մանտիայի կարևոր բաղադրիչ։ Դրանց գոյությունը հաստատվել է ինչպես լաբորատոր փորձերով, այնպես էլ սեյսմիկ դիտարկումներով. այս շրջանում ալիքների արագությունը համապատասխանում է պերովսկիտ ապարների հատկություններին։

GRACE գրավիտացիոն տվյալների վերլուծությունը բացահայտել է զանգվածի տեղաշարժ, որը առաջացրել է Երկրի ձգողականության տեղային փոփոխություն։ Գիտնականները ենթադրում են, որ միջուկ-մանտիա սահմանին դեֆորմացիան կարող էր հասնել մոտավորապես տասը սանտիմետրի։ Սա, իր հերթին, կարող էր ազդել հեղուկ միջուկի շարժման վրա և հանգեցնել դիտարկվող մագնիսական անոմալիաների։

Հետազոտողները ընդգծում են, որ այս գործընթացների ճշգրիտ պատճառները դեռևս պարզված չեն, սակայն ուսումնասիրության արդյունքները կօգնեն ավելի լավ հասկանալ մոլորակի ներքին կառուցվածքը, ինչպես նաև դրա ազդեցությունը գեոդինամիկական գործընթացների վրա, այդ թվում՝ երկրաշարժերի և Երկրի մագնիսական դաշտի ձևավորման վրա։

Թարգմանութոյւնը՝  Lurer.com-ի