Մեծ Բրիտանիայում ՄԱԿ-ը համեմատել են «քայլող դիակի» հետ

ՄԱԿ-ն իր 80-ամյակի նախօրեին կանգնած է լրջագույն ճգնաժամի առջև. կազմակերպությունն ավելի ու ավելի է վերածվում «քայլող դիակի» և վտանգում է կրկնել Ազգերի Լիգայի ճակատագիրը: Այս մասին հայտնում է բրիտանական Financial Times պարբերականը։

ՄԱԿ-ի հասցեին քննադատություններ են հնչեցնում կազմակերպության բազմաթիվ անդամներ, այդ թվում՝ Ռուսաստանն ու ԱՄՆ-ն։ Հռոմի նոր պապ Լևոն XIV-ի կարծիքով՝ կազմակերպությունը կորցրել է «մարդկանց միավորելու» ունակությունը, իսկ ՄԱԿ-ի նախկին գլխավոր քարտուղար Քոֆի Անանի ավագ օգնական Նադեր Մուսավիզադեն ընդգծել է՝ միավորումը բախվում է ոչ միայն արտաքին, այլև ներքին ճգնաժամի:

«Ներքին ճգնաժամը պայմանավորված է իշխանության, ներուժի և ազդեցության 20-ամյա թուլացմամբ, հատկապես բնակչության ամենաաղքատ խավերի և հակամարտությունների գոտիներում գտնվող մարդկանց շրջանում։ Ներկայիս ճգնաժամը կապված է հակամարտությանն ու մեծ տերությունների մրցակցությանը վերադառնալու հետ», - նշել է պաշտոնյան։