ԵՄ-ն Ուկրաինային կֆինանսավորի ռուսական սառեցված ակտիվներից․ Reuters

Ուկրաինան կարող է Եվրամիությունից մինչև 130 մլրդ եվրո ֆինանսավորում ակնկալել՝ «ռեպարացիոն վարկի» ձևաչափով։ Այս մասին հայտնում է Reuters-ը՝ հղում անելով ԵՄ կառույցներում իր աղբյուրներին։

Մեխանիզմի հիմքում ԵՄ-ում սառեցված մոտ 210 մլրդ եվրոյի ռուսական ակտիվներն են։ Հենց այդ միջոցներն են հիմք հանդիսացել G7-ի գծով Ուկրաինային 45 մլրդ եվրոյի օգնության նախկինում համաձայնեցված փաթեթի համար։ Այժմ Բրյուսելն առաջարկում է օգտագործել դրանք նոր տրանշի համար, բայց միայն Կիևի կողմից նախորդ վարկը մարելուց հետո։

ԵՄ-ի մտահղացմամբ՝ Ուկրաինային հատկացված գումարները պետք է վերադարձվեն միայն խաղաղ համաձայնագրի շրջանակներում Ռուսաստանից փոխհատուցումներ ստանալուց հետո։ Միևնույն ժամանակ, Եվրահանձնաժողովը փնտրում է իրավական սխեմա, որը թույլ կտա օգտագործել սառեցված ռուսական ակտիվները առանց դրանց ուղղակի բռնագրավման, ինչը մի շարք երկրների և Եվրոպական կենտրոնական բանկի առարկություններ է առաջացնում: