Fox News-ի հաղորդավարը սկանդալ առաջացրեց ՄԱԿ-ի հասցեին հայտարարությամբ

Fox News-ի հաղորդավար Ջեսի Ուոթերսը, մեկնաբանելով Դոնալդ Թրամփի ելույթի ժամանակ ՄԱԿ-ի շենքում առաջացած տեխնիկական խնդիրները, եթերում սկանդալային հայտարարություն է արել։ Նա սաբոտաժ է որակել ոչ գործող էսկալատորը և խափանված տելեսուֆլերը՝ առաջարկելով, որ Վաշինգտոնը կամ դուրս գա ՄԱԿ-ից, կամ էլ «պայթեցնի նրա շենքը Նյու Յորքում»։

Ուոթերսը նաև հավելել է, որ «եթե ռումբը անհնար է, կարելի է գազով հարվածել»։ Նրա գործընկերները փորձել են հակադարձել այդ մտքերին, սակայն նա շարունակել է պնդել, որ ՄԱԿ-ի շենքը կարելի է պարզապես քանդել։

Հաղորդավարը չի պարզաբանել՝ իր խոսքերը հումորային էին, թե լուրջ։ Միջադեպը համընկել է Դոնալդ Թրամփի պաշտոնական բողոքի հետ, երբ նա դիմել է ՄԱԿ-ի գլխավոր քարտուղարին՝ պահանջելով հետաքննել իր ելույթի ընթացքում տեղի ունեցած «երեքակի սաբոտաժը»՝ կապված էսկալատորի կանգնեցման, տելեսուֆլերի խափանման և ձայնային խնդիրների հետ։