Ռուսական լրատվականներն անդրադարձել են իմպիչմենթի քաղաքական գործընթացին

Երևանում, Ազգային ժողովի շենքի դիմաց, այսօր տեղի է ունենում ակցիա՝ վարչապետ Նիկոլ Փաշինյանի իմպիչմենթի պահանջով։ Ինչպես հաղորդում է РИА Новости-ի թղթակիցը, խորհրդարանում ընթանում են լսումներ՝ ընդդիմադիր «Պատիվ ունեմ» խմբակցության պատրաստած վարչապետին պաշտոնից հեռացնելու վերաբերյալ նախագծի շուրջ։

Փաստաթղթում նշվում է, որ կառավարությունը չի կատարել իր իսկ ներկայացրած ծրագրի պարտավորությունները, չկարողացավ արդյունավետ արձագանքել երկրի առջև ծառացած մարտահրավերներին և երբեմն նույնիսկ դարձել է դրանց պատճառ։ Ընդդիմությունը հայտարարում է, որ իշխանությունների գործունեությունը հանգեցրել է պետական կառավարման համակարգային ճգնաժամի, ազգային անվտանգության և երկրի ինքնիշխանության թուլացմանը, սոցիալ-տնտեսական ու ժողովրդավարական ոլորտների անկմանը՝ վտանգի տակ դնելով Հայաստանի ապագան։

Ընդդիմությունը մեղադրում է Փաշինյանին ազգային անվտանգության ռազմավարության ձախողման, Արցախը կորցնելու, ռազմագերիների և արցախյան ղեկավարների ազատ արձակումը չապահովելու, արտաքին քաղաքականության սխալների ու միակողմանի զիջումների, ինչպես նաև մարդու իրավունքների խախտման, կոռուպցիայի աճի և տնտեսության անկման մեջ։ Ֆրակցիան առաջարկում է ձևավորել անցումային ազգային համաձայնության կառավարություն՝ առաջնահերթ համարելով ազգային անվտանգության ոլորտի կայունացումը, օրենքի գերակայության վերականգնումը, քաղաքական դատապարտյալների ազատումը և նոր՝ ազատ ու մրցակցային ընտրությունների կազմակերպումը։

Ըստ օրենքի՝ իմփիչմենթի գործընթաց սկսելու համար անհրաժեշտ է առնվազն 36 պատգամավորի ստորագրություն և 54 պատգամավորի քվե կողմ, մինչդեռ ընդդիմադիր երկու խմբակցություններն ընդհանուր ունեն 34 մանդատ, իսկ իշխող «Քաղաքացիական պայմանագիր» խմբակցությունը՝ 69