Երեք ուկրաինացի ձերբակալվել է՝ Ֆուկուսիմայի արգելված գոտում տուն ներխուժելու համար

Ճապոնիայում ոստիկանությունը ձերբակալել է երեք ուկրաինացի քաղաքացու՝ դատարկ տուն ներխուժելու համար Օկումա քաղաքում, որը գտնվում է «Ֆուկուսիմա-1» ատոմակայանի արգելված գոտում։ Այդ մասին հայտնում է NHK-ն՝ հղում կատարելով իրավապահներին։

Ոստիկանության տվյալներով՝ ձերբակալվածներն են 34-ամյա Անատոլի Դիբակը, 29-ամյա Վլադիսլավ Սավինովը և 43-ամյա Ալեքսանդր Կրիվկովը։ Նրանց մեղադրում են բնակարանի անձեռնմխելիության մասին օրենքը խախտելու մեջ։

Հայտնի է դարձել, որ սեպտեմբերի 23-ի երեկոյան ոստիկանություն էր զանգել անհայտ քաղաքացի՝ տեղեկացնելով, որ YouTube-ում ուղիղ եթերով ցուցադրվում է, թե ինչպես են օտարերկրացիները ներխուժում բնակելի տուն։ Հաջորդ առավոտ երեք կասկածյալներին ձերբակալել են հենց դեպքի վայրում։