Թրամփի դիրքորոշման շրջադարձի պատճառը կարող է լինել հանդիպումը Չարլզ III-ի հետ

Telegraph-ի դիվանագիտական աղբյուրների խոսքով՝ ԱՄՆ նախագահ Դոնալդ Թրամփի դիրքորոշման փոփոխությունը Ուկրաինայի հարցում կարող է կապված լինել նրա հանդիպման հետ Մեծ Բրիտանիայի թագավոր Չարլզ III-ի հետ։ Աղբյուրները նշել են, որ Ուկրաինայի թեման քննարկվել է նրանց անձնական զրույցների ընթացքում պետական այցի ժամանակ։

Հանդիպումից հետո Թրամփը սոցիալական ցանցերում գրել էր, որ Ուկրաինան Եվրամիության աջակցությամբ ի վիճակի է ոչ միայն վերադարձնել կորցրած տարածքները, այլև «գուցե գնալ ավելի հեռու»։ Նա նաև Զելենսկու հետ բանակցությունների ժամանակ հայտարարել էր, թե Ռուսաստանի տնտեսությունը «սարսափելի վիճակում է»։

ՌԴ Անվտանգության խորհրդի փոխնախագահ Դմիտրի Մեդվեդևը արձագանքել էր այս հայտարարություններին՝ դրանք անվանելով «քաղաքական մոգական մանտրաներ» և հավելել, որ Թրամփը կրկին ընկել է «այլընտրանքային իրականություն», որտեղ «Կիևը հաղթում է, Ռուսաստանը բաժանված է կտորների, իսկ ուկրաինական տնտեսությունը ծաղկում է»։