Արդյոք չի՞ սխալվում թուրքագետը

Այսօր լրագրողների հետ հանդիպմանը «Հենարան» ակումբում թուրքագետ Հակոբ Չաքրյանը կարծիք հայտնեց, որ Ֆրանսիայի սենատը, այնուամենայնիվ, կընդունի հայոց ցեղասպանության ժխտումը քրեականացնող օրինագծ ընդունումը։ Այդ տեսակետը թուրքագետը հայտնում է՝ հիմք ընդունելով թուրքական մամուլում տեղ գտնող վերլուծությունները, որոնցում ևս շոշափվում է օրինագծի ընդունման հավանականությունը։ Թուրքագետը կարծում է, որ դա չի անդրադառնա ֆրանս–թուրքական հարաբերությունների վրա, քանի որ Թուրքիան հստակ գիտակցում է, թե Ֆրանսիայի հետ հարաբերությունները վատացնելը ինչ ազդեցություն կարող է ունենալ երկրի տնտեսական իրավիճակի վրա։ 

Իսկ Սենատի Իրավական հարցերի հանձնաժողովի կողմից նախագծի հակասահմանադրական համարելը Չաքրյանը չի համարում հիմք օրինագծի հնարավոր մերժման համար, քանի որ այս հանձնաժողովի տեսակետը ունի խորհրդատվական նշանակություն, ոչ թե՝ պարտադրանքի։

Ինչ վերաբերում է օրինագծի ընդունման դրական հետևանքներին, թուրքագետը դրանցից առանձացրեց այն, որ ընդունումը կխթանի հայոց ցեղասպանության ճանաչման գործընթացին, կնպաստի, որ Եվրոպական երկրներում հայոց ցեղասպանության վերաբերյալ ձևավորվի միասնական դիրքորոշում, բացի այդ դա մեծ հարված է թուրքական ժխտողականությանը, իսկ եթե հաշվի առնենք, որ դա Թուրքիայի քաղաքական թեզն է, դրանով նաև վերացնում ենք դրա քաղաքական թեզը։ 

Այն հարցին, թե չե՞ն ստիպի արդյոք Թուրքիայի կողմից հնարավոր հոխորտանքները, Հ.Չաքրյանը նշեց, որ Թուրքիայի հոխորտանքներին ոչ մեկ էական նշանակություն չի տալիս։ Համենայն դեպս, ինքը՝ թուրքագետը, դրանք լուրջ չի ընդունում։