Իսրայելում ԱՄՆ դեսպանն առաջին անգամ վերջին տասնամյակների ընթացքում պաշտոնական այց է կատարելու Եգիպտոս

Իսրայելում ԱՄՆ դեսպան Մայք Հաքաբին պատրաստվում է այցելել Եգիպտոս՝ հանդիպելու եգիպտացի պաշտոնյաների հետ, հայտնում է AFP-ը՝ վկայակոչելով դեսպանատան աղբյուրին։

Սա գործող ամերիկացի դեսպանի համար հազվադեպ այց է։ Հաքաբիի հանդիպումները եգիպտացի պաշտոնյաների հետ համարվում են տարածաշրջանային ԱՄՆ դեսպանատների միջև անցկացվող պարբերական դիվանագիտական խորհրդակցությունների մաս, նշել է AFP-ի հետ զրույցում դեսպանատան խոսնակը։ «Այս ծանոթացման այցը արտահայտում է ԱՄՆ-ի անփոփոխ հանձնառությունը՝ պահպանելու բաց և կառուցողական երկխոսություն տարածաշրջանային գործընկերների հետ՝ տարածաշրջանում ընդհանուր նպատակներին հասնելու համար»։

Դեսպանատունը չի հայտնել այցի մանրամասները կամ ամսաթիվը, սակայն ըստ լրատվամիջոցների՝ սա վերջին տասնամյակների ընթացքում ԱՄՆ-ի Իսրայելում գործող դեսպանի առաջին այցն է Եգիպտոս։ Սպասվում է, որ բանակցությունների հիմնական թեման կլինի Գազայի պատերազմը, որը սրել է Իսրայելի և Կահիրեի հարաբերությունները։ Եգիպտոսը, ԱՄՆ-ի և Քաթարի հետ միասին, միջնորդ է հանդես գալիս Իսրայելի և ՀԱՄԱՍ-ի միջև՝ պատերազմը դադարեցնելու ջանքերում։

Կահիրեն քննադատել է Գազա քաղաքի դեմ շարունակվող օդային և ցամաքային հարձակումները, որտեղ, ըստ ՄԱԿ-ի գնահատման, ռազմական գործողություններից առաջ բնակվում էր շուրջ մեկ միլիոն մարդ։

news.am