Շվեդիայում քննարկել են սեփական միջուկային զենքի ստեղծումը

Շվեդիայում քննարկումներ են սկսվել սեփական միջուկային զենքի մշակման հնարավորության շուրջ։ Այս մասին հայտնում է բրիտանական Times պարբերականը։

Նյութում ասվում է` շվեդական թերթերի մի շարք հոդվածներից հետո երկրում քննարկումներ են ծավալվել այն մասին՝ արդյոք Ստոկհոլմը պետք է ատոմային ռումբ ստանալու նոր փորձ ձեռնարկի՝ միայնակ, թե ՆԱՏՕ-ի իր դաշնակիցների հետ համատեղ: Չնայած այն հանգամանքին, որ սեփական միջուկային զենքի գաղափարը դեռևս գործնական մարմնացում չի ստացել, այն արդեն սկսել են քննարկել շվեդական քաղաքական դաշտում:

Գիտնականների և փորձագետների կարծիքով՝ Շվեդիան դժվար թե ունենա անհրաժեշտ տեխնոլոգիական և ռեսուրսային բազա միջուկային զենքի ինքնուրույն մշակման համար։ Երկրում գործում է վեց ատոմակայան, սակայն դրանք կառուցվել են ավելի քան 40 տարի առաջ։ Փորձագետ Մարտին Գոլիաթի խոսքով՝ շվեդները շատ բան պետք է մշակեն, ներառյալ միջուկային զենքի համար անհրաժեշտ նյութերի արտադրության ողջ ենթակառուցվածքը: Դա կպահանջի հսկայական ներդրումներ, ուստի անհրաժեշտ ռեսուրսներ գտնելը գրեթե անհնար կլինի: