«Հայկական» օրինագծի ընդունումը Ղարաբաղյան հարցի վրա միայն դրական ազդեցություն կունենա

Այսօր լրագրողների հետ հանդիպման ավարտին ԼՈՒՐԵՐ.com–ի թղթակիցը իր հարցերն ուղղեց թուրքագետ Հակոբ Չաքրյանին, մասնավորապես՝ թե ինչպիսի ազդեցություն կարող է ունենալ  «հայկական» օրինագծի ընդունումը Ղարաբաղյան խնդրի կարգավորման հարցում։ Բացի այդ՝ մամուլում կարծիքներ են շրջանառվում, որ հայ–ռուս–ադրբեջանական հանդիպումը և սենատում օրինագծի քննարկման օրերի համընկնումը պատահական  չէ։ Թուրքագետը մեկնաբանելով հարցը, նշեց, որ իր կարծիքով դա ազդեցություն չի ունենա Ղարաբաղյան խնդրի վրա։

«Ազդեցություն դա չի ունենա, բայց այստեղ մի կողմում ֆրանսիական նախաձեռնությունն է, դա Ռուսաստանին երկրորդ պլան է մղում։ Չի բացառվում, որ Մոսկվան, հիշեցնելու  համար, որ ինքն էլ գոյություն ունի, մի նախաձեռնություն էլ ինքը հանդես բերի», – նշեց նա։ Թուրքագետը կարծում է, որ եթե միակ ազդեցությունը, որը կարող է ունենալ  այս հարցում Հայաստանի համար միայն դրական կողմ ունի։  «Դա կսահմանափակի Թուրքիայի կողմից Հայաստանի վրա ճնշում գործադրելու հնարավորությունները։ Մեր դիրքերը միջազգային ասպարեզում Թուրքիայի դեմ կամրապնդվեն։ Դա  կկաշկանդի Թուրքիայի ավելի ակտիվ մասնակցությունը Ղարաբաղի գործընթացին», – նշեց թուրքագետը՝ մանրամասնելով, որ միաժամանակ թուրքական նախաձեռնությունը ընդդեմ Հայաստանի  անհամեմատ քիչ արձագանք կգտնի միջազգային ասպարեզում, եթե Թուրքիան մեղադրվի ցեղասպանություն իրագործելու մեջ։ 

Անդրադառնալով այս պարագայում Ադրբեջանի հնարավոր դիրքորոշմանը՝ Հ. Չաքրյանը նշեց. «Ադրբեջանի վիճակն էլ մի քիչ բարդ է, որովհետև խնդրո առարկան Ֆրանսիան է, որը մեծ տերություն լինելուց զատ՝ Մինսկի խմբի համանախագահող երկիր է»։