Մի շարք երկրներ աջակցել են Թրամփի ծրագրին․ DW

Մի շարք համաշխարհային առաջնորդներ և ԱԳՆ ղեկավարներ հայտնել են՝ աջակցում են Գազայում իրավիճակի կարգավորման ԱՄՆ նախագահ Դոնալդ Թրամփի խաղաղ ծրագրին և պատրաստ են համագործակցել անկլավում ռազմական գործողությունները դադարեցնելու համար: Այս մասին հայտնում է Deutsche Welle-ն։

«Մենք բոլոր կողմերին կոչ ենք անում միավորվել և համագործակցել ԱՄՆ վարչակազմի հետ, որպեսզի վերջնականապես համաձայնեցնեն այդ առաջարկը և այն կյանքի կոչեն», - հայտարարել Է Մեծ Բրիտանիայի վարչապետ Քիր Սթարմերը: Նրա կարծիքով՝ ՀԱՄԱՍ-ը պետք է ընդունի ԱՄՆ-ի ծրագիրը, վայր դնի զենքը և ազատ արձակի մնացած պատանդներին: Վեերջինս նշել է՝ Մեծ Բրիտանիան պատրաստ է համագործակցել իր գործընկերների հետ, որպեսզի «կայուն խաղաղություն ապահովի, որի դեպքում պաղեստինցիներն ու իսրայելցիները կկարողանան կողք կողքի ապրել անվտանգության պայմաններում»:

Իտալիայի վարչապետ Ջորջիա Մելոնին նույնպես ողջունել է ԱՄՆ-ի առաջարկը՝ հայտարարելով՝ այն կարող է դառնալ «շրջադարձային պահ, որը թույլ կտա ապահովել ռազմական գործողությունների մշտական դադարեցումը, բոլոր պատանդների անհապաղ ազատ արձակումը և քաղաքացիական բնակչության համար լիարժեք ու անվտանգ մարդասիրական հասանելիությունը»: Մինչդեռ Ֆրանսիայի նախագահ Էմանուել Մակրոնը հայտարարել է՝ ակնկալում է «այդ հիմքի վրա Իսրայելի վճռական գործողությունները»: «ՀԱՄԱՍ-ն այլ ընտրություն չունի, քան անհապաղ ազատ արձակել բոլոր պատանդներին և հետևել այդ ծրագրին», - հավելել է նախագահը: