Թալիբանի հրահանգով Աֆղանստանում անջատվել են բջջային կապն ու ինտերնետը

Reuters-ի տեղեկացմամբ՝ Թալիբանի վարչակազմը կարգադրել է անջատել բջջային և ինտերնետային ծառայությունները ողջ Աֆղանստանում։ Արդյունքում խափանվել են ավիաչվերթները, բանկային և առողջապահական համակարգերը։ Կապի բացակայությունը գրեթե լիովին կտրել է երկիրը արտաքին աշխարհից։

ՄԱԿ-ը կոչ է արել անհապաղ վերականգնել կապը՝ հայտարարելով, որ նման քայլը վնասում է աֆղան ժողովրդի կյանքին, հատկապես՝ երկրաշարժից տուժած շրջաններին և միլիոնավոր վերադարձած փախստականներին։ Կաբուլի արժութային շուկան շարունակում է գործել նախորդ օրվա փոխարժեքներով, իսկ բանկերի աշխատանքը խափանվել է։

Կապի դադարեցումը սկսվել է փուլերով և հասել է նույնիսկ հեռախոսային ծառայություններին։ Ըստ Tolo News-ի՝ բջջային ցանցերում դադարեցվել են 3G և 4G ծառայությունները, թողնելով միայն հին՝ 2G ստանդարտը։ ՄԱԿ-ի գործակալությունները նշել են, որ չեն կարողանում կապ հաստատել իրենց առաջնագծի աշխատակիցների հետ, ինչը մեծացնում է հումանիտար ճգնաժամը երկրում։