ՄԱԳԱՏԷ-ի ղեկավարը ահազանգում է Զապորոժժյեի ԱԷԿ-ում սպասվող միջուկային վտանգի մասին

ՄԱԳԱՏԷ-ի ղեկավար Ռաֆայել Գրոսսին մտահոգություն է հայտնել Զապորոժժյեի ԱԷԿ-ում հնարավոր վթարի կապակցությամբ՝ կայանի հերթական անջատման պատճառով։ Reuters-ի փոխանցմամբ՝ նա ընդգծել է, որ չնայած կայանը ներկայումս աշխատում է արտակարգ դիզելային գեներատորների շնորհիվ, իրավիճակը շարունակում է մնալ վտանգավոր և անկայուն։

«Քանի դեռ գեներատորները գործում են, անմիջական սպառնալիք չկա, սակայն իրավիճակը հստակորեն անկայուն է և ոչ մի կողմ շահած դուրս չի գա միջուկային վթարից», – նշել է Գրոսսին։ Նրա խոսքով՝ կայանի վառելիքի պաշարները կբավարարեն մոտ 10 օր, և միայն նոր մատակարարումների դեպքում հնարավոր կլինի խուսափել վթարից։

Գործակալության ղեկավարը հիշեցրել է, որ ցանկացած հարված միջուկային օբյեկտների ուղղությամբ անընդունելի է և վտանգավոր՝ կոչ անելով նվազեցնել Զապորոժժյեի ԱԷԿ-ի վրա հարձակումները և կանխել աղետալի հետևանքները, գրում է Лента.ру-ն։