«Շուստրիներն էլի մնալու են ստվերային դաշտում

«Պարզապես բյուջե են կազմել: Իրականում, երբ խորանում ենք, տեսնում ենք, որ շատ վտանգավոր նախաձեռնություն է: Կառավարությունն այն ծայրից չի սկսել, որից պետք է սկսեր: Կառավարությունը պետք է գնահատեր տնտեսական պոտենցիալը, արդյոք այն մոտ 10 միլիարդ դոլարանոց տնտեսական պոտենցիալն է»,-այս մասին այսօր լրագրողների հետ հանդիպման ժամանակ ասաց ՀԱԿ ներկայացուցիչ, տնտեսագետ՝ Վահագն Խաչատրյանը:

Անդրադառնալով բյուջեն 101 միլիարդ դրամով ավելացնելու կառավարության որոշմանը` ՀԱԿ ներկայացուցիչը նշեց, որ այդ գումարը հավաքելու համար հարկավոր է քաղաքական որոշում, թե ումից պետք է հավաքվեն այդ գումարները:

Նրա խոսքերով. «Քաղաքական որոշման համար Սերժ Սարգսյանը պետք է հավաքի օլիգարխներին եւ ասի` վերջ, այսօրվանից աշխատում ենք ինվոյսներով, այսինքն սեւ շուկան պիտի էականորեն կրճատվի: Խաղի կանոնները պիտի փոխվեն: Հիմա կանոնները չեն փոխվում, իսկ գումարները փորձում են ավելացնել: Առաջանում է լուրջ պրոբլեմ, թե ում հաշվին պետք է արվի: Եթե չկա քաղաքական որոշում, հերթական անգամ այդ բեռն ընկնելու է մանր եւ միջին բիզնեսի վրա: Հերթական անգամ այդ մարդիկ ենթարկվելու են ճնշման»։

Նա նշեց նաեւ, որ եթե այդ ավելացման բեռը չի ընկնելու բոլորի, այդ թվում խոշոր տնտեսվարողների վրա, բյուջեն կարելի է շատ վատ գնահատել. «Շուստրիներն էլի մնալու են ստվերային դաշտում: Այս բյուջեն շատ բացասական ազդեցություն կունենա բիզնեսի վրա», եզրակացրեց Վահագն Խաչատրյանը: