«Կոալիցիա կամավորներից» դարձան «կոալիցիա սպասողների». Ռասմուսսեն

ՆԱՏՕ-ի նախկին գլխավոր քարտուղար Անդերս Ֆոգ Ռասմուսսենը քննադատել է Ուկրաինային աջակցող երկրների՝ «կոալիցիա կամավորների» նախաձեռնությունը՝ նշելով, որ այն դադարել է առաջընթաց գրանցել և վերածվել է «կոալիցիա սպասողների»։ Այս մասին նա ասել է իսպանական El Mundo-ին տված հարցազրույցում։

«Ես գնահատում եմ քննարկումները, որոնք ընթանում են այս կոալիցիայի շրջանակում, բայց այժմ այն ավելի շատ հիշեցնում է սպասողների միավորում։ Առաջընթաց չկա», — հայտարարել է Ռասմուսսենը։ Նրա խոսքով՝ լավագույն հաջորդ քայլը կլիներ եվրոպական զսպող ուժերի տեղակայումը Ուկրաինայում՝ ԱՄՆ-ի աջակցությամբ, ինչը «հստակ ազդակ» կհաղորդեր Ռուսաստանին։ Նախկին գլխավոր քարտուղարի կարծիքով՝ եվրոպական զորքերը ստիպված չէին լինի ուղիղ մարտերի մեջ մտնել ռուսական բանակի հետ․ նրանց դերը կարող էր լինել խոշոր քաղաքների և կենսական նշանակություն ունեցող ենթակառուցվածքների պաշտպանությունը երկրի թիկունքում։

Ավելի վաղ Բելգիայի վարչապետ Բարտ Դե Վևերը կոչ էր արել «կոալիցիա կամավորներին» վերանայել իրենց մոտեցումը և վերածվել «կոալիցիա վճարողների», ընդգծելով ֆինանսական աջակցության անհրաժեշտությունը։